මි මැසි පාලනය කරමු

ගෝචර ශාක පිළිබද අවබෝධයක් නොමැති අයෙකුට ඒ සදහා සුදුසුම ස්ථාන වන්නේ ස්වාභාවිකවම මී මැස්සන් වාසය කරන ස්ථාන තෝරා ගැනීමයි. තවද, තෝරා ගන්නා ගෝචර ශාක වලින් උපරිම ප්‍රයෝජනය ගත හැක්කේ මී මැස්සාට පහසුවෙන් පියාසර කල හැකි දුර ප්‍රමාණයක ඒවා පිහිටියහොත් පමණයි. එබැවින් මේ ගැනද සැලකිලිමත් විය යුතුය. බාධක නොමැතිව ගෝචර ශාකය වෙත කෙලින්ම පියාසර කල හැකි ප්‍රදේශ හා ස්ථාන තොර ගැනීමටත්, එය උපරිම වශයෙන් මීටර 200 කට සීමා කිරීමටත් වග බලාගැනීම වැදගත්ය.

ස්වාභාවික ලෙස මී මැස්සා ප්‍රියකරන්නේ අඩ අදුරු සිසිල් ප්‍රදේශ බැවින් ඇළ දොල ආශ්‍රිත වූ ප්‍රදේශ මී මැසි පාලනය සදහා තොර ගත යුතුය. තවද කෘෂි රසායනික වර්ග බහුලව භාවිතා කරනු ලබන ප්‍රදේශ මී මැස්සාට අහිතකර බැවින් එම ප්‍රදේශවල ජනපද පිහිටුවීමෙන් වැළකිය යුතුය.​

මී මැසි ගණයට අයත් මී මැසි වර්ග තුනක් ලංකාවේ දක්නට ලැබෙනවා. බඹරා, දඩුවැල් මැස්ස සහ මී මැස්සා මෙම වර්ග තුනට අයත්ය. මීට අමතරව සුළු පැණි ප්‍රමාණයක් නිපදවන කන මැස්සාද වේ. එළිමහනේ පිහිටි උස ගල්තලා, ගස් හෝ ගොඩනැගිලි තම වාසස්ථාන කර ගන්න බඹරා ලොකු මී මැස්සෙකි. විශාල පැණි ප්‍රමාණයක් නිපදවයි. බඹර පැණි මී පැණීම බව අමතක නොකළ යුතුය. හුදෙක්ම එළිමහනේ තනි වදයක් බදින හා තැනින් තැනට කලින් කලට සංක්‍රමණය වීමේ ස්වාභාවික ගති පැවතුම් ඇති බැවින් ගෘහස්තව බඹරුන් ඇතිකළ නොහැක. එසේම බඹරා දරුණුය. බඹරා පැණිවල ඇති ජලය නිසාත් මත්වන සුළු ස්වභාවය නිසාත්, බඹර පැණි අගයෙන් අඩු යයි සැලකුවද එය ගුණයෙන් වැඩි පැණි වර්ගයක් ලෙස හදුන්වා දිය හැකිය. හොදින් සකසා ගතහොත් බඹර පැණි සදහා වැඩි මිලක් ලබා ගැනීම අපහසු නොවේ.​

දඩුවැල් මැස්සාද බඹරා මෙන් තැනින් තැනට කලින් කලට සංක්‍රමණය වන්නෙකි.අඩ අදුරු ස්ථානවල පිහිටි පහත් අතු පතර මත තනි වදයක් බදී. එය කුඩා වදයකි. මෙම පැණි තත්වයෙන් උසස් පැණි වර්ගයක් ලෙස සැලකුවද ලබා ගත හැකි අගය ඉතා අවමය.

අප ඇති කරන මී මැස්සා ඉහත සදහන් මී මැසි දෙවර්ගයටම වඩා හාත්පසින්ම වෙනස් ජිවන රටාවක් ගත කරන සතෙකි. සම්පුර්ණයෙන්ම අදුරු ස්ථාන ප්‍රිය කරන මෙම අලස කෘමියා එක ස්ථානයක බොහෝ කාලයක් රැදී සිටීමට ප්‍රියතාවයක් දක්වයි. එකිනෙකට සමාන්තරවුද ක්‍රමානුකුලවුද ලෙස වද කිහිපයක්ම ගොඩ නගයි. ගස් බෙන, තුඹස්, ගල්වැටි හෝ එවැනි ඉඩ පහසුකම් සහිත අදුරු ස්ථානවල තම ජනපද පිහිටුවා ගනී. මෙම ජීවන රටාව නිසාම මී මැස්සන් ගෘහස්ථව ඇතිකිරීමේ හැකියාව අපහට ලැබී තිබේ.

මී මැසි ගණයට අයත් නොවුනද කනමී මැස්සා ද සුළු වශයෙන් පැණි නිපදවන වැදගත් කෘමියෙකි. පැණි නිපදවිමෙහිලා ආර්ථික වටිනාකමක් නොමැති වුවද බෝග පරාගනයෙහිලා ගොවියාට ඉමහත් සේවයක් සේවයක් මෙම කෘමියා ඉටු කරයි.

ලංකාවේ වෙසෙන මී මැස්සා "එපිස්සෙරනා ඉන්ඩිකා"(Apiscerana Indika) යන විද්‍යාත්මක නාමයෙන් හැදින්වේ. බටහිර රටවල යුරෝපා මී මැස්සා (Apis Melifera) සමග සංසන්දනය කළහොත් මෙරට මී මැස්සා කුඩාය. ජනපදයක සිටින මැස්සන් සංඛ්‍යාවද අඩුය. යුරෝපා මී මැසි ජනපදයක මැස්සන් 80000-120000 පමණ දැකිය හැකි වුවද ලංකාවේ ජනපදයක ඇත්තේ මැස්සන් 2500-10000 ක් අතර සංඛ්‍යාවකි. ඉතාමත් විශාල ජනපදයක උපරිම වශයෙන් 20000කි මේ හේතුවෙන් නිපදවන ලබන පැණි ප්‍රමාණයද අඩුය. සාමාන්‍යයෙන් මෙය පැණි කිලෝ ග්‍රෑම් 1 1/2 - 2 අතර වේ. ඉතා හිතකර ප්‍රදේශයක ක්‍රමානුකුල ලෙස පාලනය කිරීමෙන් උපරිම වශයෙන් පැණි කිලෝ ග්‍රෑම් 6-8 පමණ ලබාගත හැක.​